Како изгледала една римска гозба? Што јаделе и пиеле старите Римјани? Какви обичаи, верувања и општествени правила биле поврзани со храната, виното и заедничката трпеза?
Во древниот Рим, гозбата била многу повеќе од оброк. Таа била простор за дружење, разговори, склучување сојузи, демонстрирање статус и одржување на општествените врски.
Инспирирано од оваа традиција, Креактива создаде ексклузивно доживување кое ги поврзува историското знаење, античката гастрономија, оживеаната историја и современите пристапи кон интерпретација на културното наследство.
Во центарот на доживувањето е римската трпеза, со специјалитети подготвени според историски документирани рецепти, прилагодени на современите вкусови.
Во зависност од избраното мени, гастрономската понуда може да вклучува:
- Libum (римски леб со сирење)
- Intinge (различни римски намази)
- Moretum (намаз од сирење, лук и билки)
- Savillum (римски колач со сирење и мед)
- Dulcia domestica (урми со мед и јаткасти плодови)
- Mulsum (римско вино засладено со мед и зачини)
Храната и виното се само еден дел од ова доживување.
Преку раскажување приказни, оживеана историја и учество во историски инспирирани игри и предизвици, учесниците откриваат различни аспекти од секојдневниот живот, обичаите и културата на Римската Империја.
Посебен дел од атмосферата создаваат репликите на римски садови, чиниите во кои се послужува храната, амфората за вино и римските чаши, кои ја дополнуваат историската поставеност на доживувањето.
„Римска гозба“ е наменета за оние кои бараат повеќе од вообичаено гастрономско дружење: внимателно осмислена програма во која историјата, вкусовите и приказните создаваат единствено заедничко искуство.
Што опфаќа доживувањето?
- Дегустација на специјалитети подготвени според антички римски рецепти.
- Дегустација на вино инспирирано од римската традиција.
- Оживеана историја и раскажување историски приказни.
- Учество во гамифицирани активности од древниот Рим, со елементи на игра и истражување.
- Послужување во реплики на римски садови и употреба на автентични историски реквизити.
- Програма под стручно водство на археолог и сертифициран интерпретатор на културно наследство.
Конкретната содржина и гастрономската понуда се приспособуваат на избраниот формат на доживувањето.
За кои пригоди е наменето?
„Римска гозба“ може да се организира за различни приватни, деловни и протоколарни пригоди:
- Приватни семејни дружења и прослави.
- Родендени, годишнини и посебни пригоди.
- Корпоративни настани и тимски дружења (team building).
- Дипломатски приеми и протоколарни настани.
- Деловни средби и приеми за партнери и гости.
- Тематски вечери и ексклузивни приватни настани.
Секоја програма се приспособува на карактерот на настанот, профилот на учесниците и посакуваниот амбиент.
Локација и можности за комбинирање
„Римска гозба“ може да се реализира како самостојно доживување во винарија, ресторан или соодветен приватен простор.
Постои и можност за комбинирање со посета на музеј или археолошки локалитет, вклучително и античкиот град Стоби, каде што римското културно наследство може да се запознае непосредно, во неговиот историски контекст.
Во зависност од избраната локација, програмата може да вклучува дополнителни содржини, како посета на музејска поставка, разгледување на античкото наследство на терен или дополнителна винска дегустација.
Сите содржини, локации и дополнителни услуги се договараат индивидуално, во согласност со желбите на клиентот, расположивоста на просторот и условите на институциите или другите партнери.
Дополнителни опции по избор
Римски костими за учесниците
За оние кои сакаат дополнително да ја доживеат атмосферата на древниот Рим, постои можност за изнајмување до 15 римски костими. Костимите се дополнителна опција, достапна по претходен договор и со посебна доплата.
Проширена програма
По барање, доживувањето може да се надополни со дополнителни историски содржини, посети на културни локалитети или дополнителни вински дегустации.
